കളമശ്ശേരിയില്‍ യുവതിയെ ക്രൂരമായി ആക്രമിച്ച്‌ സ്വര്‍ണം കവര്‍ന്നു ; തലയില്‍ മുണ്ടിട്ടു മൂടി തല തൂണില്‍ ഇടിപ്പിച്ചും കല്ലിനിടിച്ചും അവശയാക്കി

എച്ച്‌.എം.ടി. കവലയ്ക്ക് സമീപമുള്ള കടയില്‍ ജോലികഴിഞ്ഞ് താമസസ്ഥലത്തേക്ക് പോകുകയായിരുന്ന യുവതിയുടെ ഒരു പവൻ സ്വർണമാലയും ഒരുകാതിലെ കമ്മലുമാണ് അക്രമി കവർന്നത്. പാന്റും ഷർട്ടും തൊപ്പിയും ധരിച്ചിരുന്ന അക്രമിയുടെ കൈയില്‍ ബാഗും ഉണ്ടായിരുന്നു.

എച്ച്‌.എം.ടി. കവല റെയില്‍വേ മേല്‍പ്പാലത്തിന് അടിയില്‍വെച്ച്‌ ഞായറാഴ്ച രാത്രി 8.15-ഓടെയാണ് യുവതിയെ ആക്രമിച്ചത്. റെയില്‍വേ മേല്‍പ്പാലത്തിന്റെ തൂണില്‍ യുവതിയുടെ തല പലതവണ ഇടിപ്പിച്ചു.

സമീപത്തുകിടന്നിരുന്ന കല്ലുകള്‍ ഉപയോഗിച്ചും തലയ്ക്കിടിച്ചതായി യുവതി പറഞ്ഞെന്ന് വാർഡ് കൗണ്‍സിലർ അഡ്വ. സഹ്‌ന സാംബ്ജി പറഞ്ഞു. വിവരമറിഞ്ഞെത്തിയ കളമശ്ശേരി പോലീസ് അന്വേഷണം നടത്തുന്നുണ്ട്.